काठमाडौं : आज र भोलि पश्चिमी न्यूनचापीय प्रणालीको प्रभावका कारण उच्च पहाडी र हिमाली भेगमा हिमपातको सम्भावना रहेको मौसमविदले जानकारी दिएका छन्। यसका साथै देशका विभिन्न स्थानमा छिटफुटदेखि हल्का वर्षा पनि हुनसक्ने पूर्वानुमान गरिएको छ।

जल तथा मौसम विज्ञान विभागको मौसम पूर्वानुमान महाशाखाका मौसमविद सरोज पुडासैनीका अनुसार सोमबार साँझदेखि सुदूरपश्चिम, कर्णाली र गण्डकी प्रदेशका उच्च पहाडी तथा हिमाली भेगका केही स्थानहरूमा हल्का हिउँ पर्ने सम्भावना छ। यस्तै, सुदूरपश्चिम र कर्णाली प्रदेशका पहाडी भूभागका केही स्थानहरूमा हल्का वर्षा हुने सम्भावना पनि व्यक्त गरिएको छ।

मंगलबार९ पुस २३ ०को दिन कोशी, बागमती र गण्डकी प्रदेशका उच्च पहाडी र हिमाली भूभागका केही स्थानमा हल्का हिउँ पर्ने संभावना छ। यसैगरी सुदूरपश्चिम र कर्णाली प्रदेशका थोरै स्थानहरूमा पनि हल्का हिउँ पर्ने अपेक्षा गरिएको छ।

मौसमविद पुडासैनीका अनुसार यी सबै क्षेत्रका पहाडी भूभागका केही स्थानहरूमा छिटफुटदेखि हल्का वर्षा पनि हुने छ। अन्य भूभागका एक दुई स्थानमा हल्का वर्षा हुनसक्ने सम्भावना रहेको छ ।

पश्चिमी न्यूनचापीय प्रणालीको प्रभावका कारण तापक्रममा गिरावट आउने र चिसो बढ्ने पनि पूर्वानुमान गरिएको छ। तर बुधबार बिहानदेखि भने मौसममा क्रमिक सुधार हुने छ ।