काठमाडौँ । प्रमुख प्रतिपक्षी नेकपा माओवादी केन्द्रले संसदको हिउँदे अधिवेशनको तयारीका लागि संसदीय दलको बैठक बोलाएको छ।

बैठक बिहीबार दिउँसो १ बजे सिंहदरबारस्थित संसदीय दलको कार्यालयमा हुने प्रमुख सचेतक हितराज पाण्डेले जानकारी दिएका छन्।

यस बैठकको उद्देश्य माघ १८ गतेदेखि सुरु हुने संसदको हिउँदे अधिवेशनको तयारीका विभिन्न पक्षमा छलफल गर्नु रहेको छ। बैठकमा पार्टीको तर्फबाट सदनमा खेल्नुपर्ने भूमिका कानुनी मस्यौदा, र अन्य महत्वपूर्ण विषयहरूमा छलफल हुनेछ।

माओवादी केन्द्रले केपी ओलीको सरकारलाई ६ महिनामा असफल भएको ठहर गर्दै सरकारको नीति र कार्यशैलीमा आलोचना गरेको छ। सरकारले सुशासन, सामाजिक न्याय र समृद्धिको मार्गमा उल्टो बाटो समातेको र संसदको अधिकारको अवज्ञा गर्दै निरङ्कुश तरिकाले अध्यादेश मार्फत शासन गर्न खोजेको माओवादीको आरोप छ।

प्रमुख प्रतिपक्षी दलका नेता प्रचण्डले विपक्षी ७ दलको बैठक बोलाएर सरकारविरुद्ध कडा दबाब दिने रणनीति बनाएका छन्। उनीहरूले साझा पाँच बुँदे धारणा तय गरेर आगामी संसद अधिवेशनमा कडा प्रस्तुत हुने जानकारी दिएका छन् ।