अमेरिकी राष्ट्रपति डोनाल्ड ट्रम्पले दक्षिण अफ्रिकालाई दिँदै आएको सहायता रोक्ने चेतावनी दिएका छन् । दक्षिण अफ्रिकाले मानव अधिकारको गम्भीर उल्लंघन गरेको भन्दै ट्रम्पले सहायता रोक्ने चेतावनी दिएका हुन् ।‘दक्षिण अफ्रिकाले जमिन कब्जा गरिरहेको छ र केही विशेष वर्गका व्यक्तिहरुसँग नराम्रो व्यवहार गरिरहेको छ ।

यो निकै नराम्रो स्थिति भए पनि यसबारे कट्टर लेफ्ट मिडियाले धेरै कुरा गरेका छैनन्,’ सामाजिक सञ्जाल ट्रुथ सोसलमा ट्रम्पले लेखेका छन्, ‘मानवअधिकारको गम्भीर उल्लंघन भइरहेको छ । अमेरिकाले यसविरुद्ध कदम उठाउने छ ।’ उनले यससम्बन्धी अध्ययन पूरा नभएसम्मका लागि दक्षिण अफ्रिकालाई भविष्यमा दिइने सबै सहायता बन्द गरिदिने उल्लेख गरेका छन् ।एक सरकारी आँकडा अनुसार सन् २०२३ मा अमेरिकाले दक्षिण अफ्रिकालाई ४४ करोड डलर सहायता दिएको थियो । यसअघि ट्रम्पले मेक्सिको र क्यानडाबाट आयात हुने वस्तुमा २५ प्रतिशतको दरले र चीनबाट आयात हुने वस्तुमा १० प्रतिशतको दरले ट्यारिफ लगाउने निर्णय गरेका थिए ।

राष्ट्रपति ट्रम्पले गत महिना दक्षिण अफ्रिकासँगको सम्बन्धलाई लिएर आफू चिन्तित भएको अभिव्यक्ति दिएका थिए ।