काठमाडौं । प्रतिनिधि सभाका सभामुख देवराज घिमिरेले प्रमुख दलका प्रमुख सचेतकहरू र मुख्य सचेतकसँग आज बैठक बोलाएका छन्।

सभामुखको सचिवालयले दिएको जानकारीअनुसार बैठक आज दिउँसो ३ बजे सिंहदरबारमा आयोजना हुनेछ।

बैठकको प्रमुख उद्देश्य सरकारले ल्याएका अध्यादेश र अन्य समसामयिक विषयहरूमा छलफल गर्नु रहेको छ। सरकारले प्रस्तुत गरेका अध्यादेशहरूलाई विपक्षी दलहरूले चर्को विरोध जनाएका छन्, जसको समाधानका लागि सभामुखले प्रमुख सचेतकहरूसँग छलफल गर्ने निर्णय लिएका हुन्।

बिहीबार प्रतिनिधि सभाको बैठक बस्ने कार्यक्रम रहेको छ । यसअघि दलका प्रमुख सचेतकसँग छलफल गर्न बैठक बोलाइएको हो।

कांग्रेसको संसदीय दलका प्रमुख सचेतक श्याम घिमिरे, एमालेका महेश वर्तौला, माओवादीका हितराज पाण्डे, रास्वपाका सन्तोष परियार, र राप्रपाका ज्ञानेन्द्र शाही प्रमुख सचेतकका रूपमा बैठकमा सहभागी हुनेछन्।