काठमाडौं। बालकोट फिकाधारास्थित एक घरमा बुबा र भाइको हत्यामा संग्लन रहेको आरोपमा फरार रहेका मिलन आचार्य पक्राउ परेका छन् ।

आचार्य आफैँ प्रहरीवृत्त महाराज पुगेको काठमाडौं उपत्यका अपराध अनुसन्धान कार्यालयका सूचना अधिकारी प्रहरी उपरिक्षक काजीकुमार आचार्यले जानकारी दिए। प्रारम्भिक सोधपुछका क्रममा आचार्यले अपराध स्विकारेको उनले बताए।

दिक्तेल रुपाकोट मझुवागढी नगरपालिका–१ दिक्तेल घरभई भक्तपुर बालकोटस्थित डेरामा बस्ने ५६ वर्षीय कूलप्रसाद आचार्य र उनका २२ वर्षीय कान्छा छोरा प्रवीणको हत्या कूलप्रसादकै २५ वर्षीय जेठा छोरा मिलनबाट भएको प्रहरीले आशंकासहित प्रहरीले उनको खोजी गरिरहेको थियो ।

सोमबार बिहान दुई बाबुछोरा छुट्टाछुट्टै कोठामा मृत अवस्थामा भेटिए पनी सँगै बस्ने जेठा छोरा आचार्य भने सम्पर्कविहीन भएपछी प्रहरीले उनीमाथि आशंका गरिएअनुसार नै अनुसन्धान अघि बढाएको थियो।

छिमेकीले शनिवार साँझ तीनै जना बाबुछोरालाई सँगै खाना खाएको देखे पनि आइतवार दिनभरी र आज पनि कोठा खुलेको नदेखेपछि प्रहरीलाई खबर गरेका थिए। जिल्ला हुलाक कार्यालय खोटाङका निमित्त कार्यालय प्रमुख आचार्य गत मङ्सिर २८ गते बिदा लिएर बालकोटस्थित छोराहरू बस्दै आएको कोठामा आएका थिए।

दुईभाई छोरामध्ये जेठा छोरा मिलन स्नातक तह उत्तीर्ण गरेर लोकसेवाको तयारी गर्दै गरेका र कान्छो छोरा प्रवीण भने विज्ञान संकायमा स्नातक अध्ययनरत रहेको अनुसन्धानबाट खुलेको प्रहरीले जनाएको छ।