काठमाडौँ । पश्चिमी न्यूनचापीय प्रणालीको प्रभावले नेपालका अधिकांश स्थानमा मौसम बदली भइरहेको छ। मौसम पूर्वानुमान महाशाखाका अनुसार आज दिउँसो आंशिकदेखि साधारणतया बदली रहने छ र भोलि सोमबार देशका पहाडी क्षेत्रमा हल्का वर्षा र हिमाली क्षेत्रमा हिमपातको सम्भावना रहेको छ।

महाशाखाका मौसमविद् बिनु महर्जनका अनुसार वर्तमानमा कर्णाली, लुम्बिनी, गण्डकी, बाग्मती र मधेस प्रदेशको पूर्वी भूभागमा मौसम सामान्यतया बदली छ भने कोशी र सुदूरपश्चिम प्रदेशमा आंशिक बदली देखिएको छ। आज दिउँसो देशको पहाडी र हिमाली क्षेत्रमा आंशिकदेखि साधारणतया मौसम बदली रहने र केही स्थानमा वर्षा हुनेछ।

आज राति कोशी र गण्डकी प्रदेशका उच्च पहाडी र हिमाली भूभागमा हल्का हिमपातको सम्भावना रहेको महाशाखाले जनाएको छ।

त्यस्तै, सुदूरपश्चिमका पहाडी र उच्च हिमाली क्षेत्र र अन्य प्रदेशका उच्च पहाडी तथा हिमाली भूभागका केही स्थानमा हल्का हिमपातको सम्भावना रहेको पनि जानकारी दिइएको छ। पश्चिमी न्यूनचापीय प्रणालीको प्रभाव सोमबार र मङ्गलबार अझ बढी रहने अपेक्षा गरिएको छ । जसका कारण बदली र वर्षा जारी रहने महाशाखाले उल्लेख गरेको छ।