बुटवल । रुपन्देहीको तिलोत्तमा शंकर नगरस्थित एक रेस्टुरेन्टकी युवती मृत अवस्थामा फेला परेकी छन्।

गुल्मीको मालिका गाउँपालिका–८, मरभुङ्ग रैथुम टोलकी २० वर्षीय बिमला राना कुमाल तिलोत्तमा नगरपालिका २ स्थित नेवारी खाजा घरको कोठामा मृत भेटिएकी बुटवल इलाका प्रहरी कार्यालयका प्रमुख डिएसपी विजय पण्डितले जानकारी दिए।

डिएसपी पण्डितका अनुसार उनी खाजा घरमा काम गर्दै आएकी थिइन् । उनी आफू बस्ने कोठामा झुण्डिएको अवस्थामा मृत फेला परेकी हुन्। अहिले प्रहरीले अनुसन्धान थालेका छ भने घटनाको विस्तृत कारण पत्ता लगाउने प्रयास भइरहेको बताइएको छ ।

बिमला राना कुमाल १४ महिनादेखि नेवारी खाजा घरमा काम गर्दै आएकी थिइन् । उनी सोही खाजा घरको कोठामा बस्ने गर्थिन्। घटनाको राती साढे ११ बजेतिर उनले फेसबुकमा बाबुआमालाई सम्झेर स्टाटस लेखेकी थिइन्।

मृतक युवतीका बाबु थम्मनबहादुर कुमाल र उनकी श्रीमतीलाई घटनाको खबर पाएपछि रुपन्देही पठाइएको जानकारी मालिका गाउँपालिका ८ का वडाध्यक्ष सूर्यबहादुर जिसीले दिए।