काठमाडौं । स्वास्थ्य तथा जनसंख्या मन्त्री प्रदीप पौडेलले विद्यालय पाठ्यक्रममा स्वास्थ्य जनचेतनाका विषय परिमार्जन गर्नका लागि शिक्षा, विज्ञान तथा प्रविधि मन्त्री विद्या भट्टराईसँग सहयोगका लागि आग्रह गरेका छन्।

मन्त्रालयमा भएको बैठकमा मन्त्री पौडेलले विद्यालय स्तरमा स्वास्थ्यसम्बन्धी विषयलाई परिमार्जन गर्नका लागि विज्ञ समिति गठन गर्न सहकार्यको प्रस्ताव गरेका छन्।

मन्त्री पौडेलले नसर्ने रोगको संख्या बढिरहेको अवस्थामा यसलाई रोक्नका लागि विद्यालय तहबाट नै सचेतनामूलक सामग्री प्रभावकारी बनाउन आवश्यक भएको बताए। उनले पाठ्यक्रम विकास केन्द्रसँग सहकार्य गर्दै स्तरीय सामग्री तयार गर्नका लागि तयारी रहेको जानकारी दिए।

उनले पाठ्यक्रममा स्वास्थ्य खानपिन र मादक पदार्थविरुद्ध सचेतनाका विषय पनि समावेश गर्नका लागि पनि सघाउने प्रतिबद्धता जनाए।

पढाइमा स्वास्थ्यसम्बन्धी विषयमा अध्ययन गरेका विद्यार्थीलाई उच्च शिक्षासँग जोड्नुपर्ने आवश्यकता रहेको उल्लेख गर्दै उनले नर्सिङ, सार्वजनिक स्वास्थ्य वा अन्य सम्बन्धित विषयसँग जोड्ने बारेमा छलफल गर्न प्रस्ताव गरे।

मन्त्री पौडेलले विद्यालय शिक्षामा स्वास्थ्य क्षेत्रमा काम गर्ने जनशक्ति उत्पादनमा जोड दिने आवश्यकता रहेको बताए।

यस विषयमा दुवै मन्त्रालयको संयुक्त समूह बनाउने प्रस्तावलाई मन्त्री भट्टराईले सकारात्मक रूपले स्वीकार गर्दै थप गृहकार्य गर्ने सुझाव दिइन्।