‘होस्टेल ३’ को दोस्रो पोस्टर सार्वजनिक, आगामी फागुनमा रिलिज
काठमाडौं : नेपालका चर्चित चलचित्र शृङ्खला ‘होस्टेल’ को तेस्रो संस्करण, ‘होस्टेल ३’ को दोस्रो पोस्टर सार्वजनिक गरिएको छ। आगामी फागुन २३ गते रिलिज हुने यो चलचित्रको नयाँ पोस्टरमा प्रमुख कलाकारहरूको एक झलक प्रस्तुत गरिएको छ।
पहिले सार्वजनिक गरिएको पोस्टरमा चार प्रमुख अभिनेता आशिष घिमिरे, पारस बम (कुलब्वाई), रिहान गिरि र पदम तामाङलाई रमाइलो मुद्रामा प्रस्तुत गरिएको थियो। नयाँ पोस्टरमा यी कलाकारहरूसँगै अभिनेत्रीहरू सिम्रन पन्त, हेना नगरकोटी र समा पराजुली पनि समावेश गरिएको छ। यो पोस्टर राकेश दाहालले डिजाइन गरेका हुन्।
‘होस्टेल ३’ मा क्याम्पस जीवनका संघर्ष, मित्रता र रमाइलो क्षणहरूको कथा प्रस्तुत गरिदै छ। चलचित्र नेपालसहित अन्य देशहरूमा पनि रिलिज हुने तयारीमा छ।
यो चलचित्र सशान कँडेलको निर्देशनमा बनेको हो भने स्क्रिप्ट माधव शर्माले लेखेका छन् । चलचित्र सम्मान इन्टरटेनमेन्ट र आरोन कन फिल्म्सको सहकार्यमा निर्माण गरिएको हो।
निर्माता सुरेश कँडेल, कर्ण कार्की र गोविन्द अधिकारी छन् भने कार्यकारी निर्माता शङ्कर कोइराला हुन्। सहनिर्माताहरू शिशिर ज्ञवाली, कुन्दन गुप्ता र अनिस सिग्देल रहेका छन्। यसमा उमर खान, सन्तोष बानियाँ, रोहन श्रेष्ठ, आशिष पुरुषलगायतका कलाकारहरूको पनि अभिनय रहेको छ।
चलचित्रको डिओपी अर्जुन तिवारी, सिनेमाटोग्राफर बुद्ध थापा र मनोज खत्री, मुख्य सहायक निर्देशक सुदिप कुँवर, प्रोडक्सन डिजाइनर यम प्रसाद ओली, र संगीतकारहरू अर्जुन पोखरेल, अलमोडा राणा उप्रेती, महेश ज्ञवाली र किरण माइकल रहेका छन्।
‘होस्टेल ३’ यसअघि प्रदर्शन भएका ‘होस्टेल’ र ‘होस्टेल रिटर्न्स’ का सफलतापछि निर्माण गरिएको हो । यो चलचित्र युवा दर्शकमाझ ठूलो चर्चा पाउने आशा गरिएको छ।
Facebook Comment