काठमाडौं । संयुक्त राज्य अमेरिकामा लोकप्रिय सामाजिक सञ्जाल प्लेटफर्म टिकटक बन्द गरिएको छ।

आइतबार बिहानदेखि अमेरिकाभरि टिकटक पहुँचमा रोक लगाइएको र मोबाइल प्रयोगकर्ताहरूले एप्लिकेशन हटाइएको देखेका छन्। साथै गुगल, प्ले स्टोर र एप्पल स्टोरमा पनि टिकटक एप्लिकेसन उपलब्ध छैन।

अमेरिकी सरकारको निर्देशनअनुसार टिकटकको स्वामित्व रहेको चिनियाँ कम्पनी बाइटडान्सलाई अमेरिकामा टिकटक सञ्चालन जारी राख्नका लागि कम्पनीलाई बिक्री गर्नुपर्ने वा अमेरिका भर प्रतिबन्धको सामना गर्नुपर्ने चेतावनी दिइएको थियो।

यस मामिलामा परेको मुद्दामा शुक्रबार अमेरिकी उच्च अदालतले सरकारको निर्णयलाई अनुमोदन गरेपछि अमेरिकामा टिकटक बन्द भएको हो।

अमेरिकाका निर्वाचित राष्ट्रपति डोनाल्ड ट्रम्पले टिकटकलाई ९० दिनको समयसीमा दिएका थिए । उनले सोमबारदेखि आफ्नो कार्यभार सम्हाल्नेछन्।