पश्चिम नेपालका महोत्सवमा पल शाहको क्रेज, ‘मायाबी’को प्रमोशनले पायो नयाँ उचाइ
काठमाडौं : आगामी फागुन १४ गते प्रदर्शनमा आउने फिल्म ‘मायाबी’को प्रचारमा नायक पल शाहले कुनै कसर बाँकी राखेका छैनन्। आफ्नो करियरका लागि महत्वपूर्ण मानिएको यस फिल्मको प्रचारका लागि उनले पश्चिम नेपालका अधिकांश महोत्सवहरूमा सहभागिता जनाउँदै दर्शकहरूसँग प्रत्यक्ष संवाद गरिरहेका छन्।
शहरदेखि गाउँसम्मका महोत्सवमा पल शाहको उपस्थिति हेर्नको लागि ठूलो संख्यामा दर्शकहरू भेला भइरहेको देखिन्छ। कतिपय महोत्सवहरूमा त एक लाखभन्दा बढी दर्शक पललाई हेर्न पुगेका छन्।
महोत्सवमा पुगेर पलले फिल्मका गीतहरूमा नृत्य प्रस्तुत गर्दै दर्शकलाई मनोरञ्जन गराइरहेका छन्। साथै, उनले टिसर्ट र फिल्मका पोस्टरहरू वितरण गरेर फिल्मप्रति दर्शकहरूको उत्सुकता बढाइरहेका छन्।
दर्शकहरूको यस्तो ठूलो प्रतिक्रियाले पललाई पनि निकै उत्साहित बनाएको छ। “दर्शकहरूको माया र समर्थनले मलाई फिल्मको प्रदर्शनप्रति थप उत्साहित बनाएको छ,” उनले भने।
दिवाकर भट्टराईको निर्देशनमा निर्माण भएको यस फिल्ममा पल शाहसँगै दीपिका प्रसाई, प्रशान्त ताम्राकार, सुशील सिटौला, करिश्मा श्रेष्ठ र समिम खानजस्ता कलाकारहरूको अभिनय रहेको छ। फिल्मले प्रदर्शनअघि नै दर्शकको राम्रो प्रतिक्रिया पाइरहेको छ।
Facebook Comment