काठमाडौँ । भारतको उत्तर प्रदेशस्थित प्रयागराजमा जारी महाकुम्भ मेलामा बुधबार बिहान भएको भागदौडको घटनामा कम्तीमा ३० जनाको मृत्यु भएको छ भने ६० जना घाइते भएका छन्। घाइतेहरूको उपचार स्थानीय अस्पतालमा भइरहेको छ ।

केही तीर्थयात्रीहरूले प्रहरी द्वारा राखिएका सुरक्षा बैरियर नाघेर गंगा, यमुना र पौराणिक सरस्वती नदीको संगममा स्नान गर्न प्रयास गरेपछि घटना बुधबार बिहान १ देखि २ बजेको बीचमा भएको थियो । यस दिनको अमृतस्नानको अवसरमा मेला स्थलमा भीडको संख्या अत्यधिक थियो।

बुधबार ८ करोडले स्नान गरेको उत्तर प्रदेशका मुख्यमन्त्री योगी आदित्यनाथको दाबी छ । अधिकारीहरूका अनुसार बिहान ८ बजेसम्ममा ३ करोडले स्नान गरिसकेका थिए ।

मुख्यमन्त्री योगी आदित्यनाथले मृतकका परिवारलाई २५ लाख भारतीय रुपैयाँ क्षतिपूर्ति दिने घोषणा गरेका छन्। साथै घटनाबारे छानबिन गर्न न्यायिक आयोग गठन गरिएको बताइएको छ। विपक्षी दलका नेताहरूले भने मेलामा व्यवस्थापनको कमी र सुरक्षा उपायहरूको अभावलाई जिम्मेवार ठहराएका छन्।

महाकुम्भ मेला ६ सातासम्म चल्ने अनुमान गरिएको छ । जसमा करिब ४० करोड श्रद्धालुहरूको सहभागिता हुने अपेक्षा गरिएको छ। १२ वर्षको अन्तरालमा हुने यस मेलामा ६० हजार प्रहरी र १ लाख स्वयंसेवकहरूले सुरक्षा र व्यवस्थापनका लागि योगदान दिइरहेका छन्।